Pro 27 | NdeIBE | STEP | Ungazincomi ngelakusasa, ngokuba kawukwazi ukuthi liza lithweleni.

Proverbs 27

1 Ungazincomi ngelakusasa, ngokuba kawukwazi ukuthi liza lithweleni.

2 Yekela omunye akudumise, hatshi owakho umlomo; akube ngomunye, kungabi ngezakho izindebe.

3 Ilitshe liyasinda, itshebetshebe ngumthwalo onzima, kodwa ukucatshulwa yisiwula kunzima okudlula kokubili.

4 Ulaka lulolunya lentukuthelo iyagabha, kambe ngubani ongema phambi komhawu na?

5 Kungcono ukuthukwa obala kulokuthandwa ngokufihlakeleyo.

6 Ukulinyazwa ngumngane kakwesabeki, kodwa isitha sikwanga sedlulise amalawulo.

7 Osuthiyo kazithakazeleli izinyosi, kodwa kolambileyo lokubabayo kunambitheka mnandi.

8 Njengenyoni elahleka esidlekeni sayo, unjalo umuntu otshiya umuzi wakhe.

9 Amakha lempepha kuletha intokozo enhliziyweni, lobumnandi bomngane busuka ezalulekweni zakhe eziqinileyo.

10 Ungadeli umngane wakho lomngane kayihlo, futhi ungayi endlini yomfowenu nxa wehlelwe yizinhlupheko – ungcono umakhelwane eduze kolomfowenu okhatshana.

11 Hlakanipha, ndodana, ulethe intokozo enhliziyweni yami; lapho ngizakwazi ukumphendula ongeyisayo.

12 Olengqondo uthi angabona ingozi abaleke, kodwa isithutha siyaqhubeka singene enkathazweni.

13 Thatha isigqoko salowo owenzela owemzini isibambiso; sigcine njengesithembiso aluba esenzela umfazi ongelasimilo.

14 Uba umuntu evukisa umakhelwane wakhe ngokumnqolonga ekuseni kakhulu, kuzathiwa uyamqalekisa.

15 Umfazi olenkani unjengamathonsi angapheliyo mhlana kufefeza;

16 ukumkhuza kufana lokukhuza umoya loba lokubamba okulamagcobo ngesandla.

17 Njengensimbi ilola insimbi, kanjalo indoda ikhaliphisa enye.

18 Lowo onakekela isihlahla somkhiwa uzakudla izithelo zawo, kuthi lowo olondoloza umqatshi wakhe abe lodumo.

19 Njengamanzi etshengisa ubuso bomuntu, kanjalo inhliziyo yomuntu itshengisa ayikho khona.

20 UKufa leNcithakalo kakusuthisi, anjalo lamehlo omuntu.

21 Isiliva sicengwa emcepheni legolide emvuthweni, kodwa umuntu uhlolwa ngokudunyiswa akuphiwayo.

22 Ungaze uchole isiwula elitsheni, usichole njengamabele ngembokodo kawusoze ubususe ubuwula baso.

23 Woba leqiniso ukuthi uhlala usazi kuhle isimo sezifungo zakho, nanzelela imihlambi yakho;

24 ngokuba inotho kayiyikuhlala kokuphela, lomqhele wobukhosi kawuyikuba ngowezizukulwane zonke.

25 Utshani bungaqunywa kuqalise ukuhluma obunye kuthi bonke obusikiweyo ezintabeni sebubuthiwe,

26 amawundlu azakupha uboya bezigqoko, lezimbuzi zikuphe imali elingana intengo yesiqinti.

27 Uzakuba lochago lwembuzi olunengi olwakho lolwendlu yakho lusuthise lezinceku zakho.